Kamîran: Ev çend roj in em behsa tevgerên Îsraîlê yên li ser sînorê Sûriyeyê dikin, xuya ye qada vê livê ber bi kûraniyê ve diçe.

Ronahî: Li rojavayê Derayê, li herêma Hawiza Yermûkê balafirên şer û helîkopterên Îsraîlê geriyan û li herêmê dengê çend teqînan hat bihîstin.

Ronahî: Li heman herêmê li qiraxa çemê gundê Koya, leşkerên Îsraîlê welatiyek di dema berhevkirina zeytûnan de binçav kir.

Ronahî: Li bakurê Quneytîrayê jî dewriyeyeke Îsraîlê derbasî gundê Terence bû. Çavdêriya Mafên Mirovan a Sûriyeyê diyar dike ku di nava rojekê de ev sê car e hêzên Îsraîlê derbasî herêmên curbecur ên başûrê Sûriyeyê dibin.

Kamîran: Li heman herêma başûr, li gundewarê Siwêdayê jî alozî heye.

Ronahî: Li rojavayê parêzgeha Siwêdayê, li eniyên bajarokên Mecdel û Mezraayê di navbera Hêzên Parêzvanên Nîştimanî û hêzên hikumeta veguhêz de şerekî dijwar qewimî.

Ronahî: Li gorî çavkaniyên herêmî, şer piştî wê yekê dest pê kir ku xaleke Parêzvanên Nîştimanî ya li Mecdelê bi dronekê hat armancgirtin. Di pevçûnan de her du aliyan çekên giran bi kar anîn.

Kamîran: Ji başûrê Sûriyeyê berê xwe bidin bakurê rojhilat, li wir nerazîbûnek li ser biryara nû ya perwerdeyê derketiye holê.

Ronahî: Xwendekarên li bajarê Dêrikê li ber avahiya perwerdeyê kom bûn û biryara Wezareta Perwerdeyê ya hikumeta veguhêz red kirin.

Ronahî: Hikumeta veguhêz biryar dabû ku li dibistanan dersa zimanê kurdî tenê di sê saetên hefteyê de bê dayîn. Xwendekaran daxwaz kir ku mafê perwerdeya bi zimanê zikmakî bê parastin.

Kamîran: Li bajarê Humsê jî bûyereke din a çekdarî rû da.

Ronahî: Li taxa Wadî El Zeheb a Humsê, du kesên çekdar li ser motorsîklêtê gule li dikandarekî reşandin.

Ronahî: Dikandar di vê êrîşê de jiyana xwe ji dest da û êrîşkar ji cihê bûyerê reviyan. Sedema êrîşê hîn nehatiye diyarkirin.