Ronahî: Dêha Koço ya Şengalî de, ewro karwano newın ê qurbananê fermana Tebaxa sera dı hezar û çeharêsan ame definkerdiş. Merdikê bîst û pênc kesan ke sera dı hezar û nozdes ra nata qebrê koletîfan ra ameybî vetene, teslîmê keyeyanê înan bîyî.

Ronahî: Ê merdikî dı rocî verê cû Daîreya Tibê Edlî ya Bexdayî ra vejîyabî û berdîbî Musil; ewro saete dese de ucara kewtî rayir û resayî Şengal.

Kamîran: Dıwês serre ra dıme, keyeyî reyna serê înan qebran de ameyî pêser.

Ronahî: Heta nıka bi desan kesê înan qebrê koletîfan ê Koçoyî ameyî naskerdiş û dêha xo de ameyî definkerdiş, labelê prosesê tesbîtkerdişê nasnameyan hema bi temamî nêqedîyayo.

Kamîran: Şengal ra ravêrê Rojawanê Kurdıstanî û paytextê Sûrîya bibê, ke ucara gamê neweyî yê îdarî yenê eştış.

Ronahî: Heyetêkê hikumatî yê eyaletê Hesekê bi serekîya şêwirmendê serekîye Mezlûm Ebdî şi Şam. Zerrê heyetî de fermandarê Hêzanê Asayîşê Zerrî yê Hesekê Merwan Elî zî esto.

Ronahî: Pêvênayîşî Wezaretê Karê Zerrî de yenê kerdene û mexsed temamkerdişê usulanê yewkerdişê hêzanê asayîşî yo, goreyê peymana bîst û newê Çeleyê emserî ke mîyanê îdareyê ravêrtoxî û Hêzanê Sûrîya Demokratîke de ameybî îmzakerdiş.

Kamîran: Heman mıntıqa de helwestêka eskerî ya newiye zî vejîya ver.

Ronahî: Lîwayê Hesekê, ke lîwayê hîrêyın ê fîrqaya dıyine ya artêşa Sûrîya yo, hîrê cayan de ame caqerarnayiş: Koyê Kêwkebî, Qisirk û Til Beyder de. Şerwanê lîwayî perwerdeyêka bîst û yew rocan akademîya eskerî de qedênaye.

Kamîran: Vızêr ma qalê nêrazîbûna wendekar û maliman a vera birê Wezaretê Perwerdeyî kerdbi; ewro a reaksîyone çend mıntıqanê bînan de vila bîye.

Ronahî: Bacarê Til Temir û Dirbêsiyê de, heman wext de deştê Eliyanî û dêha Dêrûna Axê de, wendekarî, keyeyî û malimî vejîyayî meydanan. Zımeyê Til Temirî de, malimanê mektebê El Mensefî beyanatêk da û no sinorkerdiş red kerd.

Kamîran: Waştişo sereke çi yo?

Ronahî: Wazenê bira ke ziwanê kurdkî hewte de tenya bi hîrê saetan sinor kerdêne bêro betalkerdiş, heqê perwerdeyê bi ziwanê dadî bêro mîsogirkerdiş û no çi bikewo bin temînatê makeqanûnî.

Ronahî: Mıntıqaya roawanî ya Dêrezorî de dı hediseyê cîyayî ameyî meydan. Qezaya Cezre El Bûhemîdî de, bombaya zeliqnayîye zerrê erebeyêk de xala kontrolî ser o teqa û adır pê kewt; netîce de dı kesî bırîndar bîyî.

Ronahî: Heman kışta roawanî de, bacarê Şumêytiyê de zî otobusêk û kamyonêk pêro da û çend musafîrî giran û sivik bırîndar bîyî.

Kamîran: Rocêka girane bîye rayiranê mıntıqa ser o.

Kamîran: Xeberêka bîne ke munaqeşeyêka dîplomatîke arde pêser, îdîaya pêvênayişanê nimitkeyan ê Tirkîya de ya.

Ronahî: Ajansê xeberan Reutersî pare kerdbi ke menganê Êlulî de Tirkîya de mîyanê selahîyetdaranê hikumatê ravêrtoxî yê Sûrîya û Hîzbullahê Lubnanî de pêvênayîşî bîyê.

Ronahî: Labelê Wezaretê Înformasyonî yê Sûrîya û Serekîya Îletîşîmî ya Tirkîya zî eno melumat bi temamî red kerd û vat ti pêvênayişêkê wınasî nêbiyo.

Ronahî: Başûrê Kurdıstanî de, artêşa Îranî bi dronanê tîpê Hedîdî hêrş berd serê Kampa Azadîye ya Partîya Demokrat a Kurdıstanê Îranî ke mıntıqaya Koye ya pabesteyê eyaletê Hewlêrî de ya.

Kamîran: Derheqê zerarî de yew zanayîş esto?

Ronahî: Goreyê melumatanê verênan zerarê canî nêbiyo.