Kamîran: Çend rocî yo ma qiseyê hereketanê Îsraîlî yê serê sînorê Sûriye kenê, aseno ke meydanê nê hereketî ber bi kûranîye şono.

Ronahî: Rocawayê Dera de, herêma Hawza Yermûkî de teyareyê şerî û helîkopterê Îsraîlî gêrayî û herême de vengê çend teqayişan ame eşnawitene.

Ronahî: Heman herême de kîşta royî ya dewa Koya de, leşkeranê Îsraîlî wextê komkerdişê zeytûnan de hemwelatîyêk girewt binê çiman.

Ronahî: Zimê Quneytîra de zî dewriyeyêka Îsraîlî vîyarte dewa Terence. Çimdarîya Heqanê Merdiman a Sûriye dîyar kena ke mîyanê yew roce de no hîrê rey o ke hêzê Îsraîlî vîyarenê herêmanê cîya-cîyayan ê verocê Sûriye.

Kamîran: Heman herêma verocî de, deşt û dewanê Siwêda de zî tehlûkeyêk esto.

Ronahî: Rocawayê wîlayetê Siwêda de, enyîyanê qezayanê Mecdel û Mezraa de mîyanê Hêzanê Pawitoxanê Nîştîmanî û hêzanê hikumata sewqkerdoxe de şerêko giran qewimîya.

Ronahî: Goreyê çimeyanê herêmîyan, şer dimeyê aye dest pêkerd ke noqtayêka Pawitoxanê Nîştîmanî ya Mecdelî bi droneyêke ameye hedefkerdene. Pêkewtişan de her di hetan çekê giranî xebitnayî.

Kamîran: Verocê Sûriye ra ma bêrê hetê vakurê rocvetişî, uca zî vera qerarê neweyî yê perwerdeyî reaksîyonêk ameyo meydan.

Ronahî: Telebeyê ke sûka Dêrike de yê verê banê perwerdeyî de ameyî pêser û qerarê Wezaretê Perwerdeyî yê hikumata sewqkerdoxe red kerd.

Ronahî: Hikumata sewqkerdoxe qerar dabî ke mekteban de dersa ziwanê kurdkî hewte de tena hîrê seatan bêro dayene. Telebeyan waşt ke heqê perwerdeyê bi ziwanê dayîke bêro pawitene.

Kamîran: Sûka Humisî de zî hedîseyêko bîn ê bi çekan ame meydan.

Ronahî: Taxa Wadî El Zehebî ya Humisî de, di kesanê çekdaran serê motorsîkletî ra guleyî varnayî yew dikanwerî ser.

Ronahî: Dikanwerî nê hêrişî de cuya xo kerd vînî û hêrişkerî cayê hedîseyî ra remayî. Sebebê hêrişî hema nêamo dîyarkerdene.