Sunday, November 8
Verocê Îranî de teqayîşî ameyê meydan û artêşa Amerîka yew hêzo newe awan kerd
Verocê Îranî de teqayîşî û biryara leşkerî ya newiye ya Amerîka
Kamîran: Verocê Îranî de teqayîşî ameyê meydan, no zî daxuyanîyanê tundan ê îdareyê Amerîka dima ame.
Ronahî: Rochelatê Adeyê Qeşmî yê girêdayeyê eyaletê Hurmuzganî de di teqayîşî bîyî; heman wext de mintiqaya Caskî de zî vengê çend teqayîşan ame eşnawitene.
Ronahî: Çimeyanê fermîyan ê Îranî derheqê sebeb û zeraranê teqayîşan de agahî nêdawa, la no hedîse rojeke dima ame ke serekê Amerîka dabi zanayene ke înan vera sîstemê pawitişê hewayî yê Îranî derbê tixarî kerdê.
Kamîran: Hetê leşkerî ra zî yew gamo newe Washingtonî ra ame.
Ronahî: Artêşa Amerîka bi nameyê Irongate yew hêzo newe awan kerd; merkezê ci bacarê Tampa yê Florîda de yo û amancê ci vindarnayîşê sewqîyatê çekan o ber bi Îranî ser, bi taybetî sînoranê herrî û Deryayê Xezerî ser o.
Rewşa sîyasî û têgêrayîşê leşkerî yê Îsraîlî verocê Sûrîye de
Kamîran: Îsraîl de wezîfeyê awankerdîşê hukmatî bedelîya, la sînorê Sûrîye de zî têgêrayîşê leşkerî dewam kenê.
Ronahî: Serekê Îsraîlî Ishaq Herzogî bi fermî serekê partîya Yesh Atidî Gadi Eisenkot seba awankerdîşê kabîneya newiye wezîfedar kerd; Eisenkotî se û vîst kursîyanê Meclîsî ra destegê şêst û hewt endaman girewto û dewsa Benjamin Netanyahuyî gêno.
Ronahî: Hetê bînî ra, yew hêzo leşkerî yê Îsraîlî bi çeharse erebeyan kewto dewa Semedanîye ya rocawanê Quneytra û uca de kewtê bînayê yew mektebî miyan.
Kamîran: Deweranê eyaletî de nuqtayê neweyî yê kontrolî zî ameyê ronayene.
Ronahî: Mintiqaya Kesratî ya nezdîyê Cebata El Xeşebî de û rayîrê Mezreeta El Emelî ser o nuqtayê kontrolî ameyê ronayene, û rocawanê Derayî de zî dormeyê dewa Cemlayî bi çekanê giranan ame gulebernayene.
Hepisxaneyê nêweş Tuncer Saglamî cuya xo vîn kerd
Kamîran: Hepisxaneyanê Tirkîya ra yew xebera girane esta.
Ronahî: Hepisxaneyo nêweş Tuncer Saglamî dima ke vîst û panc rocî Nêweşxaneyê Bacarî yê Etlîkî yê Enqere de tedawî bî cuya xo vîn kerd.
Ronahî: Saglamî verê cê Hepisxaneyê Asayîşê Berzî yê Wanî de amêne tewqîfkerdene, la dima ke rewşa ey xirab bîye newê Teşrîna Verêne de ame berdene seba Hepisxaneyê Amarê Di yê Sîncanî; cenazayê ey dîya keyeyê ey ke Wan de bêro definkerdene.
Zêdîyayîşê rêjeya bêkarîye Sûrîye de
Kamîran: Ceng û alozo derg aborîya Sûrîye bi temamî kerd vildimîn.
Ronahî: Wezîrê Senayî yê Sûrîye Nîdal El Şearî da zanayene ke peynîya serra di hezar û vîst û pancî de rêjeya bêkarîye se ra şêstî ravîyarta.
Ronahî: Pisporê aborîye vanê nezdîyê se ra pancas û pancê kapasıteya aborîye vîn bîyo, û na rewşe tewr zêde ciwananê ke newe unîversîte ra mezun bîyê ser o tesîr kena.
Adeyê El Hierro yê Îspanya de rewşa lezkerde ameye îlankerdene
Kamîran: Ewropa de zî babetê multecîyan rî bi rîyê yew krîzo newe yeno.
Ronahî: Destpêkê nê Teşrîna Peyêne ra nata zêdeyê hîrê hezar û hîrêse multecîyî bi nezdîyê sî qayiqan xwe resnayê Adeyê El Hierro yê girêdayeyê Adeyanê Kanarya.
Ronahî: Serekê Meclîsê Adeyî Albido Armasî da zanayene ke seba na pêla lezkerde, înan rewşa lezkerde îlan kerda seba ke sazîyanê dewlete ra ardimê acîlî biwazê.